Бүгүн о. э. От ыйын 31 күнүгэр биир дойдулаахпыт Татьяна Николаевна Карсанаева Чурапчыттан анаан -ааттан , сибэкки арааһын аҕалан Кыайыы болуоссатыгар олоттубут. Бу иннинэ Татьяна Николаевна , сэрии бэтэрээнин оҕото, саҥардыллыбыт стеланы көрөн , ийэлээх , аҕатыгар анаан сибэкки аҕалан барбыта. Манна кэлэ сылдьан , олус ардахтаах сайын буолан, саас бэтэрээн Сэбиэтин көҕүлээһининэн олордуллубут сорох сибэккилэр туруктара мөлтөбүтүн көрөн, элбэх үлэ ыытыллан баран , чэчирээн хараҕы үөрдэр гына үүммэтэҕиттэн олус санаарҕаан барбыт. Ол иһин дойдутун дьонугар көмөлөһөөрү , сибэккини хайдах олордору, көрөрү сүбэлээри иккиһин кэлэн барда. Манна даҕатан эттэххэ саас сибэкки олордуутугар анаан Татьяна Николаевна сибэкки иһитинэн көмөлөспүтэ. Кини кэлэрин истэн олохтоохтор эмиэ үөрэ көтө мустан көмөлөстүбүт, сүбэ -саргы ылан астынныбыт. Бүгүн өссө болуоссакка анаан дьиэлэриттэн үүннэрбит сибэккилэрин М, С, Лебедева, Н. Р. Жулева, М. П. Матаннанова, В. М . Никифорова аҕалан көҕөрдүүгэ кыттыстылар. Түмүккэ нэһилиэкпит дьонун аатыттан, баһылык махтал суругун бэтэрээн Сэбиэтин бэрэссэдээтэлэ А. К. Аргунова ааҕан туттарда, махтал тылларын анаата. Дьэ, бу курдук , ханна да олордоллор, биир дойдулаахтарбыт көмөлөһө, өйүү туралларыгар махтанабыт.
