А.Ф.Бояров 130 сылын көрсөр үөрүүлээх тэрээһинэ
Олунньу 23 күнүгэр биир дойдулаахпыт,киэн туттар киһибит, үөрэх,доруобуйа,социальнай харалта бастакы наркома, Автономияны олохтоспут дьонтон биирдэстэрэ Алексей Федотович Бояров төрөөбүтэ 130 сылын бэлиэтиир тэрээһин бэрт сэргэхтик буолла.
Дьокуускайтан сиэнэ Александр Артурович Бояров кэргэнинээн Вера Васильевналыын, хос сиэнэ Алиса Александровна Петрова, Уус-Алдан Сыырдааҕыттан хос сиэнэ Марина Алексеевна Неустроева, хос-хос сиэннэрэ Артем, Антон Неустроевтар. Горнай улууһун Бэрдьигэстээҕиттэн Ольга Алексеевна Пахомова, Ытык-Күөлтэн Афанасий Михайлович Бояров, Галина Михайловна Филатова, Федора Васильевна Заболоцкая, Михаил Александрович Протодьяконов ыалдьыттаатылар.
Тэрээһин А.Ф. Бояров скверигэр тыыннаах сибэкки ууруутуттан, улааппыт төрүт балаҕанын көрүүтүттэн, норуот айымньытын дьиэтигэр Алексей Федотович олоҕун сырдатар аналлаах стелла аһыллыытыттан саҕаланна.
Дьоро күн үөрүүлээх чааһыгар сүдү киһибит үлэлээбит үлэтин, норуотугар оҥорбут үтүөлэрин аҕынныбыт. Бэйэлэрин научнай чинчийиилэрин Г.Ф. Им, Олег Баннов, Эльза Лопатина, А.В. Бойтунова сырдаттылар.
Михаил Александрович Протодьяконов А.Ф. Бояровка аналлаах кинигэ тахсарыгар, Бояровтар аймахтарын кытта үлэлэһэрин билиһиннэрдэ. Түмүккэ А.Ф. Бояров үбүлүөйдээх сылыгар анаммыт ыһыаҕы киэҥ далааһыннаахтык ыытарга, кини олоҕун салгыы үөрэтэн ыччакка, оҕолорго билиһиннэрэр үлэлэри ыытарга сүбэ буолла.
Саха биир чаҕылхай уолун аата үйэлэргэ ааттаннын!
